“ಬಾಂಬೆ ಮಾರುಕಟ್ಟೆಯ ಸೂಚ್ಯಂಕ ಯಾನೆ ಸೆನ್ಸಿಟಿವ್ ಇಂಡೆಕ್ಸ್ ಯಾನೆ ಸೆನ್ಸೆಕ್ಸ್…
“ಇಂಡೆಕ್ಸ್ ಫಂಡಿನಲ್ಲಿ ಹೂಡಿಕೆ…”
“ಹೋಲ್‌ಸೇಲ್ ಪ್ರೈಸ್ ಇಂಡೆಕ್ಸ್ ಯಾನೆ ಸಗಟುದರ ಸೂಚ್ಯಂಕ; ಕನ್ಸ್ಯೂಮರ್ ಪ್ರೈಸ್ ಇಂಡೆಕ್ಸ್ ಯಾನೆ ಗ್ರಾಹಕದರ ಸೂಚ್ಯಂಕ…”
“ಇಂಡೆಕ್ಸೇಶನ್ ಬಳಿಕ ೨೦% ಕಾಪಿಟಲ್ ಗೈನ್ಸ್ ಟಾಕ್ಸ್…”
– ಇತ್ಯಾದಿ ಇಂಡೆಕ್ಸ್ ಅಥವ ಸೂಚ್ಯಂಕದ ಬಗ್ಗೆ ಹೂಡಿಕಾ ಲೋಕದಲ್ಲಿ ಹಲವಾರು ಕಡೆ ಕೇಳಿರುತ್ತೇವೆ.
ಏನಿದು ಸೂಚ್ಯಂಕ? ಅಥವಾ ಇಂಡೆಕ್ಸ್?
ಗುರುಗುಂಟಿರಾಯರು ೧೯೭೦ ರಲ್ಲಿ ನಾಲ್ಕಾಣೆಗೆ ಹತ್ತರಂತೆ ಅಂಬಟೆಕಾಯಿ ಖರೀದಿಸುತ್ತಿದ್ದುದನ್ನು ನೀವೆಲ್ಲರೂ ಬಲ್ಲಿರಿ. ಅಂದರೆ ೧ ಅಂಬಟೆಕಾಯಿಗೆ ಎರಡೂವರೆ ಪೈಸೆ. ಅದೇ ಈಗ ಒಂದು ಅಂಬಟೆಕಾಯಿಗೆ ಎರಡು ರುಪಾಯಿ ಆಗಿದೆ, ಅಂದರೆ ಇನ್ನೂರು ಪೈಸೆ! ಇದನ್ನೇ ಇನ್ನೊಂದು ರೀತಿಯಲ್ಲಿ ಹೇಳಬಹುದು. ೧೯೭೦ ರಲ್ಲಿ ಅಂಬಟೆಕಾಯಿಗೆ ೧೦೦ ಅಂಕ (ಸೂಚ್ಯಂಕ)ಗಳಿದ್ದಲ್ಲಿ ಇಂದು ೨೦೧೦ ರಲ್ಲಿ ಅದಕ್ಕೆ ೨೦೦/೨.೫*೧೦೦ ಅಂಕಗಳು ಅಂದರೆ ೮೦೦೦ ಅಂಕ (ಸೂಚ್ಯಂಕ)ಗಳು.
ಹಾಗೆಯೇ ಗುರುಗುಂಟಿರಾಯರಿಗೆ ೧೯೭೦ ರಲ್ಲಿ ತಲೆ ತುಂಬಾ ಕೂದಲು! ಸುಮಾರು ೫ ಲಕ್ಷ ಇರಬಹುದು! ಅದೇ ಈಗ? ನಾಗಾನಾಥ್ ಬರೆದ ರಾಯರ ಚಿತ್ರ ನೋಡಿದರೆ ನಿಮಗೆ ಕೂಡಲೇ ತಿಳಿಯುತ್ತದೆ, ತಲೆಯ ಎಡದಲ್ಲಿಷ್ಟು, ಬಲದಲ್ಲಿಷ್ಟು. . . ಸುಮಾರು ೫೦೦ ಇರಬಹುದೆನೋ? ಹಾಗಾಗಿ ಇಂದಿನ ತಾರೀಖಿನಲ್ಲಿ ಗುರುಗುಂಟಿರಾಯರ ತಲೆಕೂದಲಿನ ಇಂಡೆಕ್ಸ್ ಅಥವ ಸೂಚ್ಯಂಕ 500/500000X100= ಬರೇ 0.1 !!
ಅವತ್ತು ಒಂದು ದಿನ ಇದ್ದ ಅಂಕಿಯನ್ನು ೧೦೦ ಎಂದು ತೆಗೆದುಕೊಂಡರೆ ಇವತ್ತಿನ ಅಂಕಿ ಎಷ್ಟಾಗುತ್ತದೆ ಎಂದು ಲೆಕ್ಕ ಹಾಕಿ ಹೇಳುವ ಸೂತ್ರವೇ ಈ ಇಂಡೆಕ್ಸ್! ಒಂದು ರೀತಿಯಲ್ಲಿ ಶೇಕಡಾವಾರು ಲೆಕ್ಕದ ತರ. ಈ ರೀತಿ ಸೂಚ್ಯಂಕವನ್ನು ಉಪಯೋಗಿಸಿದರೆ ಬೇಕಾದಂತೆ ಸಂದರ್ಭಾನುಸಾರ ಲೆಕ್ಕಾಚಾರದಲ್ಲಿ ಅದನ್ನು ಬಳಸಿಕೊಳ್ಳಬಹುದಾಗಿದೆ. ಕೆಳಗಿನ ಕೆಲವು ವಾಸ್ತವಿಕ ಬಳಕೆಗಳನ್ನು ಗಮನಿಸಿ:
ಶೇರುಕಟ್ಟೆಯ ಸೆನ್ಸಿಟಿವ್ ಇಂಡೆಕ್ಸ್:
೧೯೮೬ ರಲ್ಲಿ ೧೦೦ ಆಯ್ದ ಶೇರುಗಳ ಸರಾಸರಿ ಬೆಲೆಯನ್ನು ೧೦೦ ಎಂದು ಇಟ್ಟುಕೊಂಡು ಪ್ರತಿದಿನ ಪ್ರತಿಕ್ಷಣ ಈಗಿನ ಸರಾಸರಿ ಬೆಲೆಯನ್ನು ಬಾಂಬೆ ಸೆನ್ಸಿಟಿವ್ ಇಂಡೆಕ್ಸ್/ಸೂಚ್ಯಂಕವಾಗಿ ಪ್ರಕಟಿಸಲಾಗುತ್ತದೆ. ನಾವೆಲ್ಲರೂ ಈ ಅಂಕಿಯನ್ನು ಟಿ.ವಿಯ ಕೆಳಗೆ ಒಂದು ನೀಲಿ ಅಥವ ಕೆಂಪು ಬಾಣದೊಡನೆ ಗುರುತಿಸುತ್ತೇವೆ. ಇದೇ ರೀತಿ NSE-100 ೧೯೮೩-೮೪ ರಲ್ಲಿ ೧೦೦ ಶೇರುಗಳ ಬೆಲೆಯನ್ನು ಆಧರಿಸಿ ೧೯೮೯ ರಲ್ಲಿ ಆರಂಭಗೊಂಡಿತು. ೧೯೯೪ ರಲ್ಲಿ ಇದೇ ರೀತಿ BSE-200 ಮತ್ತು Dolex-200 ಆರಂಭಗೊಂಡಿತು. ಇದೇ ರೀತಿ ನಿಫ್ಟಿ, ನಿಫ್ಟಿ ಜೂನಿಯರ್ ಹಾಗೂ ಪ್ರತಿಯೊಂದು ಸೆಕ್ಟರ್‌ಗಳಿಗೂ ಅನ್ವಯಿಸುವಂತೆ ಬ್ಯಾಂಕ್ ನಿಫ್ಟಿ, ನಿಫ್ಟಿ ಮಿಡ್ಕಾಪ್ ಇತ್ಯಾದಿ ಹಲವಾರು ಇಂಡೆಕ್ಸ್‌ಗಳು ಚಾಲ್ತಿಯಲ್ಲಿವೆ. ಇವೆಲ್ಲವೂ ಪ್ರತಿ ನಿಮಿಷ ಶೇರುಗಳ ಬೆಲೆಯಲ್ಲಿ ಏರಿಳಿತವನ್ನು ಅರ್ಥೈಸಿಕೊಳ್ಳಲು ಸಹಾಯಕವಾಗುತ್ತದೆ.
ಇಂಡೆಕ್ಸ್ ಫಂಡುಗಳು:
ಯಾವುದೇ ಒಂದು ಶೇರು ಮಾರುಕಟ್ಟೆಯ ಸೂಚ್ಯಂಕದ ನಕಲು ಹೂಡಿಕೆಯೇ ಇಂಡೆಕ್ಸ್ ಫಂಡು. ಒಂದು ಮ್ಯೂಚುವಲ್ ಫಂಡು ಸಾರ್ವಜನಿಕರ ದುಡ್ಡನ್ನು ಒಟ್ಟುಗೂಡಿಸಿ ಒಂದು ಮಾರುಕಟ್ಟೆಯ ಇಂಡೆಕ್ಸಿನಲ್ಲಿರುವ (ಉದಾ: ಸೆನ್ಸೆಕ್ಸ್, ನಿಫ್ಟಿ) ಎಲ್ಲಾ ಶೇರುಗಳಲ್ಲೂ ಅದು ಇರುವ ನೈಜ ಅನುಪಾತದಲ್ಲಿಯೇ ಹೂಡಿಕೆ ಮಾಡುವ ಫಂಡುಗಳು ಇಂಡೆಕ್ಸ್ ಫಂಡುಗಳು. ಇಲ್ಲಿ ಫಂಡುಗಳ ನಿರ್ವಹಣೆ ಏನೇನೂ ಇರುವುದಿಲ್ಲ. ಹೂಡಿಕೆಯ ಶೇರುಕಟ್ಟೆಯ ಇಂಡೆಕ್ಸಿನ ನೈಜ ಅನುಪಾತದಲ್ಲಿಯೇ ಇರಬೇಕಾದಕಾರಣ ಶೇರುಗಳನ್ನು ಮಾರುತ್ತಾ ಕೊಳ್ಳುತ್ತಾ ಇರಲಾಗುವುದಿಲ್ಲ. ಹಾಗಾಗಿ ಇವುಗಳು ‘ಪ್ಯಾಸ್ಸಿವ್ ಫಂಡ್ಸ್’ ಮತ್ತು ಇವುಗಳ ನಿರ್ವಹಣಾ ವೆಚ್ಚವೂ ಕಡಿಮೆ. ಇಂಡೆಕ್ಸಿನಲ್ಲಿರುವ ಎಲ್ಲಾ ಶೇರುಗಳನ್ನು ನೇರವಾಗಿ ಕೊಳ್ಳಲಾಗದವರು ಈ ಇಂಡೆಕ್ಸ್ ಫಂಡುಗಳ ಮೂಲಕ ಅವುಗಳನ್ನು ಕೊಳ್ಳ ಬಹುದು.
ಬೆಲೆಯೇರಿಕೆಯ ಸೂಚ್ಯಂಕ:
ಒಬ್ಬ ಸಾಮನ್ಯ ವ್ಯಕ್ತಿ ಜೀವನಾವಶ್ಯಕವಾದ ಆಹಾರ, ಇಂಧನ ಹಾಗೂ ತಯಾರಾದ ಸರಕುಗಳನ್ನು ಒಂದು ನೈಜ ಪ್ರಮಾಣದಲ್ಲಿ ಖರೀದಿಸಲು ಬೇಕಾಗುವ ವೆಚ್ಚವನ್ನು ಇಟ್ಟುಕೊಂಡು ಬೆಲೆಯೇರಿಕೆಂii ಸೂಚ್ಯಂಕವನ್ನು ಪ್ರಕಟಿಸುತ್ತದೆ. ಈಗ ಚಾಲ್ತಿಯಲ್ಲಿರುವ ಪದ್ಧತಿಯ ಪ್ರಕಾರ ೬೭೬ ಅಂತಹ ವಸ್ತುಗಳ ವೆಚ್ಚವನ್ನು, ೨೦೦೪-೦೫ ಇಸವಿಯ ವೆಚ್ಚವನ್ನು ೧೦೦ ಅಂಕ ಎಂದು ತಳಹದಿಯಾಗಿ ಇಟ್ಟುಕೊಂಡು ಪ್ರತಿ ತಿಂಗಳು/ವಾರ ಲೆಕ್ಕ ಹಾಕಿ ಸರಕಾರವು s ಸಗಟು ಬೆಲೆಯೇರಿಕೆಯ ಸೂಚ್ಯಂಕ (Wholesale price Index) ಅನ್ನು ಘೋಷಿಸುತ್ತದೆ. ಇದೇ ರೀತಿ ಪ್ರತಿ ತಿಂಗಳೂ ಗ್ರಾಹಕರ ಬೆಲೆಯೇರಿಕೆಯ ಸೂಚ್ಯಂಕವನ್ನೂ (Consumer Price Index) ಪ್ರಕಟಿಸುತ್ತದೆ. ಬೆಲೆಯೇರಿಕೆಯಲ್ಲಿ ಬದಲಾವಣೆಗಳನ್ನು ಇವುಗಳ ಮೂಲಕ ಅರ್ಥೈಸಿಕೊಳ್ಳಬಹುದು. ಅಲ್ಲದೆ ಸರಕಾರವು ತನ್ನ ನೌಕರರಿಗೆ ಭತ್ತೆಯನ್ನು (D.A) ಈ ಅಂಕಿಗಳ ಆಧಾರದ ಮೇಲೆಯೇ ನಿರ್ಧರಿಸುತ್ತದೆ.
ಇಂಡೆಕ್ಸ್ ಆಧಾರಿತ ಕಾಪಿಟಲ್ ಗೈನ್ಸ್ ಟಾಕ್ಸ್:
ಯಾವುದೇ ಕಾಪಿಟಲ್ ಕಾಲಕ್ರಮೇಣ ಬೆಳೆದು ಕೊನೆಗೊಂದು ದಿನ ಮಾರಿದಾಗ ಅದರ ಮೇಲೆ ಲಾಭ ಉಂಟಾದರೆ ಕಾಪಿಟಲ್ ಗೈನ್ಸ್ ಎಂದೂ ನಷ್ಟವಾದರೆ ಕಾಪಿಟಲ್ ಲಾಸ್ ಎಂದೂ ಪರಿಗಣಿಸಲಾಗುತ್ತದೆ. ಈ ಆಧಾರದ ಮೇಲೆ ಆದಾಯಕರನೀತಿಯಲ್ಲಿ ಕಾಪಿಟಲ್ ಗೈನ್ಸ್ ಟಾಕ್ಸ್ ಕಾನೂನು ಅನ್ವಯವಾಗುತ್ತದೆ.
ಆದರೆ ಕಾಪಿಟಲ್ ಗೈನ್ಸ್ ಬೆಲೆಯೇರಿಕೆಯ ಕಾರಣದಿಂದಲೂ ಉಂಟಾಗುತ್ತದೆ ಅಲ್ಲವೆ? ಒಂದು ಕಾಪಿಟಲ್ ಎಸೆಟ್ ಅನ್ನು ಖರೀದಿಸಿ ಇಟ್ಟಲ್ಲಿ ದೇಶದಲ್ಲಿ ತಾಂಡವವಾಡುತ್ತಿರುವ ಹಣದುಬ್ಬರದ ಕಾರಣದಿಂದಲೇ ಅದು ಸಾಕಷ್ಟು ಬೆಲೆಯೇರಿಸಿಕೊಳ್ಳುತ್ತದೆ. ಅದ್ದರಿಂದ ಯಾವುದೇ ನೈಜವಾದ ಲಾಭ ಇಲ್ಲದೆ ಆ ಅಸ್ತಿಯನ್ನು ಮಾರುವಾಗ ಅನ್ಯಾಯವಾಗಿ ನಾವು ಹಣದುಬ್ಬರದ ಮೇಲೆ ಟಾಕ್ಸ್ ನೀಡಿದಂತಾಗುತ್ತದೆ. ಅಲ್ಲವೇ?
ಈ ಸಮಸ್ಯೆಯನ್ನು ನಿವಾರಿಸಲು ಸರಕಾರವು ೧೯೯೨ ರಿಂದ ಆರಂಭಿಸಿ ಕಾಪಿಟಲ್ ಗೈನ್ಸ್ ನಲ್ಲಿ ಬೆಲೆಯೇರಿಕೆಯ ಪ್ರಭಾವವನ್ನು ತೆಗೆದು ಹಾಕಿ ನೈಜವಾದ ಲಾಭಾಂಶದ ಮೇಲೆ ಮಾತ್ರ ಕರ ಬೀಳುವಂತಹ ಒಂದ್ ಇಂಡೆಕ್ಸ್ ಪದ್ಧತಿಯನ್ನು ಆರಂಭಿಸಿತು. ಈ ಪದ್ಧತಿಯಲ್ಲಿ ಒಂದು ಅಸೆಟ್ ಅನ್ನು ಖರೀದಿಸಿ ಅಭಿವೃದ್ಧಿ ಪಡಿಸಿದ ವೆಚ್ಚಕ್ಕೆ ಅಂತಹ ಸಮಯದಿಂದ ಮಾರಾಟ ಮಾಡಿದ ಸಮಯದವರೆಗಿನ ಹಣದುಬ್ಬರದ ಪ್ರಮಾಣವನ್ನು ಒಂದು ಇಂಡೆಕ್ಸ್ ಅಥವ ಮಾಪದ ಅನುಸಾರ ಸೇರಿಸಲಾಗುತ್ತದೆ. ಕೊನೆಗೆ ಮಾರಿದ ಬೆಲೆಯಿಂದ ಅಂತಹ ಇಂಡೆಕ್ಸಿತ ವೆಚ್ಚವನ್ನು ಕಳೆಯಲಾಗುತ್ತದೆ. ಇದರಿಂದ ಬೆಲೆಯೇರಿಕೆಯ ಅಂಶ ಹೋಗಿ ಬರೇ ನೈಜ ಲಾಭಾಂಶದ ಮೇಲೆ ಮಾತ್ರ ಕರ ನೀಡಿದಂತಾಗುತ್ತದೆ.
ಕಾಪಿಟಲ್ ಗೈನ್ಸ್ ಟಾಕ್ಸ್‌ಗಾಗಿಯೇ ೧೯೮೨-೮೩ ರಿಂದ ಆರಂಭಿಸಿ ಸರಕಾರವು ಅಂತಹ ಒಂದು Cost Inflation Index ಅನ್ನು ಪ್ರಕಟಿಸಿದೆ, ಹಾಗೂ ಪ್ರತೀ ವರ್ಷ ಅದನ್ನು ನವೀಕರಿಸುತ್ತಾ ಬಂದಿದೆ.
ಈ ಟೇಬಲ್ ಬಳಸಿ ಕಾಪಿಟಲ್ ಗೈನ್ಸ್ ಟಾಕ್ಸ್ ಯಾವ ರೀತಿ ಲೆಕ್ಕ ಹಾಕಲಾಗುತ್ತದೆ? ಒಂದು ಉದಾಹರಣೆ ತಗೊಳ್ಳಿ:
ನವಂಬರ್ ೧೯೯೭ ರಲ್ಲಿ ಒಂದು ಲಕ್ಷಕ್ಕೆ ಕೊಂಡ ಭೂಮಿಯನ್ನು ಡಿಸೆಂಬರ್ ೨೦೦೮ ರಲ್ಲಿ ೩ ಲಕ್ಷಕ್ಕೆ ಮಾರಲಾಗಿದೆ.
೧೯೯೭ ರಲ್ಲಿ ೧ ಲಕ್ಷ ವೆಚ್ಚಕ್ಕೆ ತೆಗೆದುಕೊಂಡ ಭೂಮಿಯನ್ನು ಇಂಡೆಕ್ಸ್ ಆಧಾರಿತ ರೀತಿಯಲ್ಲಿ ನೋಡಿದರೆ,
ವೆಚ್ಚ X ೨೦೦೮-೦೯ ರ ಇಂಡೆಕ್ಸ್/೧೯೯೭-೯೮ ರ ಇಂಡೆಕ್ಸ್= 100000X582/331= 175830 ಆಗುತ್ತದೆ.
ಈ ರೀತಿ ೧೯೯೭ ರಲ್ಲಿ ಕೊಂಡ ರೂ ೧೦೦೦೦೦ ವೆಚ್ಚವನ್ನು ಬೆಲೆಯೇರಿಕೆಯ ನಿಮಿತ್ತ ರೂ ೧೭೫೮೩೦ ಕ್ಕೆ ಹೆಚ್ಚಿಸಲಾಗಿದೆ. ಕೊನೆಗೊಮ್ಮೆ ಡಿಸೆಂಬರ್ ೨೦೦೮ ರಲ್ಲಿ ಆ ಭೂಮಿಯನ್ನು ರೂ ೩ ಲಕ್ಷಕ್ಕೆ ಮಾರಿದಾಗ ಲಾಭ ೩೦೦೦೦೦-೧೦೦೦೦೦= ರೂ ೨೦೦೦೦೦ ಎಂದು ಸುಲಭವಾಗಿ ಹೇಳಬಹುದಾದರೂ ಇಂಡೆಕ್ಸ್ ಆಧಾರಿತ ಲಾಭ ಬರೇ ೩೦೦೦೦೦-೧೭೫೮೩೦= ೧೨೪೧೭೦ ರೂಪಾಯಿಗಳು!! ಈಗ ಕಾಪಿಟಲ್ ಗೈನ್ಸ್ ಟಾಕ್ಸ್ ಬರೇ ೧೨೪೧೭೦ ರ ಮೇಲೆ ೨೦% ದರದಲ್ಲಿ ಕೊಟ್ಟರೆ ಆಯಿತು.
ಈ ರೀತಿ ಕಾಪಿಟಲ್ ಗೈನ್ಸ್ ಟಾಕ್ಸ್‌ನಲ್ಲಿ, ಬೆಲೆಯೇರಿಕೆಯ ಇಂಡೆಕ್ಸ್ ಅನುಸರಿಸಿ ಅದರ ಲಾಭವನ್ನು ಪಡೆಯಬಹುದಾಗಿದೆ.
***
ಕಾಸು ಕುಡಿಕೆ.com 